معاك فكة خمسة جنيه (مقال رائع جدا والتعليقات عليه ظريفة جدا)

معاك فكة خمسة جنية!!

أحمد محمد أحمد مليجي | 15-12-2010 23:35

الله يرحم أيام زمان كانت أيام جميلة ، مش زمان قوي يعني تقدر تقول من 25حوالي أو 30 سنة بس! ، أيام كان فيها بركة وخير كتير ، الموظف كان راتبه 70 جنية في الشهر وكان بيكفيه هو وعائلته وزيادة ، الله يرحم لما كان الوحد منا يلف على الدكاكين علشان يفك الخمسة جنية ، مرات كن نلاقي الفكة بسهولة ومرات كان يطلع لنا بقال مكشر ولاوي بوذه شبرين، ويقول لك مفيش فكة مع أنك لو فتحت الدرج ممكن تلاقيه مليان جنيهات وخمسينات وأرباع وقروش عارف ليه ؟ لان صاحبنا عايزك تشتري منه وتنفعه بأي حاجة حتى ولو بعشرة أو خمسة صاغ، طبعا من حقه منقدرش نقول حاجة وكل واحد حر في ماله ، أصل البقال في الزمن ده كان بيبقى فرحان قوي لما كان يبيع في اليوم بجنيهين او تلاته كان يحمد ربنا كتير ويبوس ايديه وش وضهر ، ويقول انا انهرضة امي دعيالي وابويا راضي عني ، روح شوف الدكاكين والسوبر ماركات دلوقتي هتلاقي الادراج الخشب اتغيرت بقت مكينات الكترونية وآلة حاسبة بتحسب وادرجها بقت بتفتح توماتك ما شاء الله اصبحت مليان ورق احمر من ابو مية ومتين وابو خمسين جنية وشغال عليها واحد لابس زي الباشا، وبعد كل هذا تلاقي صاحب المحل ولا السوبر ماركت يقولك الحالة تعبانة ومفيش فلوس اظاهر ان الناس فلست محدش عاد بيشتري زي الاول ، عارف ليه لأنه مستعجل وعايز يجمع بسرعة تمن الديكورات اللي عملها في المحل واللي تمنها ممكن يزيد عن اضعاف البضاعة الموجودة فيه سبحان الله ، راحت فين ايام زمان لما كن بنفك الخمسة جنية ونعطي اولادنا منها خمسة صاغ او عشرة قروش مصروفهم وهمه رايحين المدرسة، والواد كان بيبقى راضي ومبسوط وفرحان بيها ، اصله كان بيشتري سندوتش بقرشين ويجيب بزيهم حلاوة عسلية أو سمسمية ، وكان ممكن يحوش بالباقي ويحطهم في حصالة خشب او في علبة سردين أو سلامون ، ولما كان يفتحها آخر الشهر ويلاقي فيها عشرة أو خمستاشر جنية كان يبقى فرحان قوي ومظغطط بيها وميبقاش عارف يشتري ايه ولا ايه ،وكمان كان بيسلف امه و ابوه منها ،والله كانت ايام حلوة شوف دلوقتي العيل وهو رايح المدرسة بياخد كام اقل شئ جنية او اتنين واللي حالته متيسرة ممكن يعطي ابنه خمسة او عشرة جنية مصروف كل يوم وفي النهاية العيال معدتش بتفهم حاجة من المدرسة ولازم دروس خصوصية ومجموعات بالشئ الفلاني ، وبردوا تلاقي العيال سرحانين ومش فاهمين عارف ليه ؟ اصلهم عايزين المدرس يخلص الدرس بسرعة علشان يروحوا يلعبوا في الشارع ولا في النادي ولا يتفرجوا على مباراة في التليفزيون أو يلعبوا بلاي ستيشن ولا يدخلوا على النت اصل كل عيل دلوقتي بقه عنده كمبيوتر واميل وعضويات في المنتديات ،وفي منهم اللي مسمي نفسه روميو وجاكسون وعامل توقيع كله غراميات وحاطط تحت اسمه صورة ممثل ولا ممثلة ، علشان يلفت الانتباه ويقولوا عليه رومنسي ولا حبيب والبنات كذلك ، او يقولوا عليه واد جنتل وابن ناس ميعرفش ان ابوه طافح الكوته وامه شقيانه ليل نهار علشان يتعلموا ويتخرجوا ويحصلوا على الشهادة ويبقوا بناءدمين زي الناس ، الحالة بقت صعبة جدا على الناس اللي اصبحت بتكلم نفسها في كل مكان وبتحسبها وبتجيبها يمين شمال علشان تعيش كويس والراتب يقضي مصاريفهم في الشهر ، معدش حد بيغني في الحمام ولا بيضحك ويكركر بنفس مفتوحة وراضبة زي الاول اصلهم خايفين على مستقبل ولادهم وبيفكروا كتير في أحوالهم وهيعملوا ايه بعد ما يتخرجوا من الجامعة وهيشتغلوا فين وبكام ، وبيفكروا كمان في بناتهم هيجهزوهم منين وفي اولادهم هيجيبوا شقة بكام وازاي ، ماهي مسئوليتهم كبيرة عليهم بردوا ومن حقهم يطمنوا علي أبنائهم امال همه عايشين ليه ولمين!، والمشكلة الكبيرة بقه لو عيل من عيالهم مرض ولا لا قدر الله وقع اتكسرت رجله ولا حصل له حاجة ،هيعملوا ايه ولا هيروحوا فين وهيجيبوا منين ، خصوصا اننا بقينا نسمع عن امراض خبيثة وجديدة علينا مكناش بنسمع عنها قبل كدة زي السكر والضغط وفيروسات الانفلونزا وغيرها ، والامراض دي طبعا مينفعش معاها الاسبرين ولا النفولجين ، اصل دلوقتي بقة في تحاليل بالشئ الفلاني ودكاترة كشفها فوق المائة جنية وياريت تلقى حجز دا ممكن يقولك تعالى بعد اسبوع ولا شهر ولو عايز تقرب المدة وتكشف بسرعة، اعمل حجز مستعجل وادفع ياعم الحاج علشان تقدر تعالج ابنك يحسن يروح منك في شربة ميه ، وساعتها هتقول ياريت وكمان ممكن تراضي التمرجي وتعطيه عشرة جنية عشان يدخلك بدري بدل ما تقعد انت وابنك بالساعات قدام العيادة ، والله مش عارف الناس هتعمل ايه ولا ايه دا حتى اعادة الكشف دلوقتي بقت بفلوس مع انها المفروض انها معمولة علشان الطبيب يتابع علاج كشفه ويشوف تشخيصة للمرض عمل ازاي ،والروشته والتحاليل والاشاعة اللي بالشئ الفلاني جابت نتيجة ولا راحت في خبر كان ، سبحان الله ... يا اخوانا الرحمة حلوة بردوا ، هم الناس الفقرا هيجيبو منين ولا هيعالجوا اولادهم ازاي، دا كيلو السكر بقة بسبعة جنية وكيلو الطماطم وصل 14 جنية ، يعني هيبقى لا أكل ولا علاج !! طيب المسكين هيعيش ازاي ؟! ، كل ده وغيره بقينا نشوفه في ايامنا ، وبعد كده بيسألوا الفقير عايز يرجع ليه لأيام زمان ؟!، وبيسألوا الغني ليه قاعد ليل نهار يدور على راحة البال ؟!.


Ahmed_mohmed_meligi@yahoo.com


اضف تعليقك
يجب ادخال اسم الاسم :
يجب ادخال عنوان عنوان التعليق:
التعليق:
يجب ادخال تعليق يجب ألا يزيد النص عن 500 حرف
أرسل التعليق

تعليقات حول الموضوع
الله يرحم ايام زمان
ابو الحمد المصري | 16-12-2010 09:19
نزعت البركة وعم المرض والفقر والمعانة بانتشار الفساد والرشوة والجشع والطمع والانانية وكل واحد واضع ايده في جيب التاني -لاحول ولاقوة الا بالله-وانا لله وانا اليه راجعون--وللأخ معلق احيانا من سرعة الكتابة تحدث اخطاء املائية سواء فصحي او عامية-المهم ان نفهم ما يعنيه كاتب المقال فهي ليست حصة املاء جزاك الله كل خير
معك حق يا (معلق) ليس التنبيه على اجادة الكتابه فقط ولكن على اجادة الحساب أيضا



معلق آخـــــــــــر | 16-12-2010 09:11
((راحت فين ايام زمان لما كن بنفك الخمسة جنية ونعطي اولادنا منها خمسة صاغ او عشرة قروش مصروفهم وهمه رايحين المدرسة، والواد كان بيبقى راضي ومبسوط وفرحان بيها ، اصله كان ممكن يحوش منهم ويحطهم في حصالة ... ولما كان يفتحها آخر __الشهر__ ويلاقي فيها عشرة أو خمستاشر جنية كان يبقى فرحان قوي)).انتهى.واضح وجود خطأ اما في الحساب أو في المدة. فلو ادخر ال 10 قروش كلهم يكون المجموع 3 جنيه فقط في الشهر. لكنه لو ادخر 5 قروش يوميا لمدة سنة تكون الحصيلة 18 جنيه.

إلى أخي ( معلق )
كاتب الموضوع | 16-12-2010 08:35
السلام عليكم اولا : اشكرك على تقدك الهادف جزاك الله كل خير بالفعل لاحظت مثل ما لاحظت حضرتك بعض الأخطاء في الموضوع ولكن للآسف كان بعد إرساله للصحيفة ، وقمت بتعديلها في مدونتي قبل ما أرى ردك http://ahmedmeligi.maktoobblog.com/ أشكرك مرة أخرى أخي الكريم وأتمنى عودتك إذا سمح وقتك بذلك لإبداء رأيك في مضمون الموضوع بارك الله فيك


بوذه - انهرضة - توماتك - ومظغطط - وبردوا - بناءدمين - بقة
معلق | 16-12-2010 07:09
يبدو أننا تجاوزنا مرحلة التنبيه على الكتابة باللغة العربية إلى مرحلة التنبيه على إجادة الكتابة بالعامية!